جعفر عباس يكتب: حبوبة قلبت الهوبا !!

للحبوبات في السودان طَعم شديد الحلاوة، وقد قدّمن لينا موروث هائل من الأدعية الطيبة، البتأكّد إنهن خزائن إبداع وحنان :

يعدّل خَطوتك، ويدّيك الفي نيتك؛ ويحل كربتك، إن شاء الله لا تنشرم لا تنترم (كيفن عاد يا حبوبة، ما كلنا حنُنترِم)، إن شاء الله لا تعمى يقودوك، ولا تتكسر يشيلوكا، عافية منك عدد الصفق في الشجر وعدد الموية في البحر، وعدد الطير الما طار. عافية منك من شيل حَكري ومن لبن شَطري. عافية منك آلاف آلاف لي يوم الوقاف… يعدّل خطوتك… ويهون قاسيتك… وينجّح قلمك… ويعدّل فهمك. كان هبشت الحصاية تنقلب موية، وكان هبشت الرمال تنقلب مال.

وتجلس حبوبة على التبروقة وتنشر جناحها الرؤوم على الجميع:

يا حافظ البيضة في صوف الخلا، لامن تفقع وتطير، تحفظ وليداتي ووليداتن، من الأذى والأذية، ومن الإيد القوية، ومن دهمة العربية، ومن هجمة الحرامية، ومن المرض الكعب والمرض الصعب، وتديهم العافي (العافية) الأحلى منها ما في.

أما إذا كنت مسافرًا:

ودعتك الله، ودعتك وداعة الألف الما بتنتلف… وداعة الله عند الرسول… كرسي فيك يدور… وجناح جبريل فوقك مشرور… ودعتك وداعة أم قيردون لي جناها… يحفظك المولى في قُبّة من حديد… أولها في الموية، وآخرها في السمايا… لا يفتحها مفتاح، لا يشوفها تمساح.

والحبوبة مواكبة للأحداث وتتمنى ليك تطلع من بند العطالة:

يعلي قلمك، ويكتر فهمك، ويديك الوظيفة العالية، يفك ساجورك، ويسهل أمورك.

وهناك الحبوبة البتعرف إنك “حنكوش”، فتدعو ليك:

يديك العافية ويسكنك الصافية.

وهاكم حكمة حبوبة:

الشعرة الما بتعرف الواجب، بتقوم في الرقبة وتخلّي الحاجب.

والعندو واسطة في بيت البكاء بياكل باصة.

احذروا اتنين: الكرونا، والبت بالكريمات فاتحة لونا.

ريد بالغصب لا بنفعك لا بيفيدك / وزولاً ما ليك أختاهو، أرفع إيدك.

البختك محل راحتو، ما تبقى ليهو تعب / والبتفتش فيك ضحكتو، ما تدي بدلو وجع.

حق الناس إن بقى شجرة، ما تشيل منو صفقة.

الكلام الشين عمرو ما بتنسى، والبدخل البطون ما بغسلو الصابون، والكلمة السمحة بذكرو بيها سيدها.

البيوت بتتجير والقلوب بتتغير، ومافي داعي للفكي عشان الله في.

ما تخاوي الجبان البتخلع من ضلو، خاوي القلبو دلوكة ومحجر كلو.

“القلبو دلوكة” هنا تُفهم في سياق الدارجية بأنها “القلبو فرِح وساهل”، لكن العبارة مجازية قد تحتاج شرح إضافي حسب السياق.)

البيعمل فيها أطرش، أوعك تصرخ في أضانو.

البختك محل راحتو، ما تبقى ليهو وجع.

اتنين أبقى عليهن عشرة: عِزة نفسك، وعزيز نفسك. الأول مقامك، والتاني سندك.

البدورك دورو، والبيآباك خلو. أوعك تتعذر لو. المطر من الله والهبوب من الله.

فتّش الروح البتشبهك، أصلو الملامح ضل ضُحى.

البهون عليه زعلك دا ما بحبك، ولو فضّل طول عمرو يقول ليك بحبك.

في أمور لازم نسلّمها لعقلنا، عشان قلبنا مرات بتوه.

شنو أكتر شي عجبك في كلام حبوبتي؟ وقلت لي حبوبتك إنت قالت شنو؟